#पन्या

माझ्या वडिलांनाही एव्हाना कळलच होतं की 4 ते 6 धुडगूस टाइम आहे. त्या दिवशी माझे बाबा दुपारी 4 वाजायला 10 मिनिटं असताना मला सांगत होते- दरवाजा उघडून ठेव. आता येईलच ती चिमणी 10 मिनिटांत. मी हो म्हणायच्या आधी खिडकीतून आवाज- येईलच काय? आलेच मी. आमच्याकडे 4 वाजलेसुद्धा. उघडा आता दार

ती आली आणि पत्त्यांचा कॅट घ्यायला टीपॉय कडे गेली.तसा नवरा म्हणाला- पन्या, आज नको ग पत्ते.. सारखा काय मुंगूस? मग म्हणाली आपण जोडपान खेळू. पंजीला पंजी, एक्क्याला एक्का असं जोडायचं फक्त. सोपं आहे. येईल तुम्हाला

नवरा म्हणाला- हो का? पण मला पत्त्याचा कंटाळा आलाय.

पन्या - मग दगड का माती, लंडन लंडन नाहीतर इष्टोप पालटी खेळूया.

नवरा- नको ग, तुला अजून काही येत नाही का?

पन्या: मला योगा येतो. करून दाखवू? आमच्या टीचर मला good girl म्हणतात. करू????

नवरा- yessss, सुखावून बेडवर पसरली स्वारी

पन्या: काका, उठून बसा. आत्या तुम्ही बसा त्यांच्या शेजारी, आजोबा तुम्ही तुमच्या बेडवरून पाहिलं तरी चालेल.

झालं, बैठकीची व्यवस्था लावून मॅडम धडाधड आसनं करायला लागल्या. छोटी आहे, अंग सुंदर वळते. आसनं झाली,आम्ही पण गुड गर्ल म्हणून सर्टिफिकेट देऊन टाकले. मग कोलांट्या उड्या चालू झाल्या. टकळी या सगळ्यात चालू च. आलिया नुसती अभ्यासात हुशार आहे, तिला आसनं येत नाहीत, करिश्मा ला skipping rope येतच नाही इ.इ.

मग मीच म्हणाले- पन्या गोष्ट येते का सांगता तुला?

पन्या- हो ssss येते की. लाकुलतोल्या ची सांगू?

आम्ही मुद्दाम हो म्हणालो. पन्या डॉन उत्तम बोबडकांदा आहे. या गोष्टीत तर लाकूडतोड्या, कुर्हाड हे कितीतरी वेळा म्हणायला लागणार होतं, मग तिला चिडवायचे असा प्रोग्रॅम होता, तो बऱ्यापैकी सफल झाला. मग टोपीवाला आणि माकडाची गोष्ट मधेच चालू झाली आणि घोषणा झाली- बोअर आहेत या गोष्टी. मला नाही आवडत. मी तुम्हाला पिच्चर ची स्टोली सांगू?

आम्ही- चालेल. कुठला पिक्चर??

आम्ही तिची कोलांटी उडी संपताना जे ऐकलं ते असं काहितरी होतं- कंचनाट्रीमाम्हाकालिकाचिमिटका ssss

माझे वडील बाहेरच आले- पन्या, उठून बस, काय झालं? ठसका लागला का?

आणि आमच्याकडे वळून- नका रे तिला काहीतरी सांगू करायला..

पन्या कोलांट्या उड्या बास.

पन्या: आजोबा, मेरको कुछ नै हुआ.

बाबा बरं म्हणून आत गेले.

आम्ही विचारलं- हा कोणता सिनेमा?

पन्या- सांगितलं की वर.

आम्ही- अग नाव परत सांग.

पन्या- ओरडून- कंचना 3- मा महाकाली का चमत्कार

आम्ही दोघे: असा सिनेमा आहे?

पन्या- मग? भुताचा आहे. गूगल करा मग सापडेल.

आम्ही थक्क- तू भूतांचे सिनेमे पहातेस? भीती नाही वाटत?

पन्या- नाही. आपण नाई घाबरत कोणाला. पण पिच्चर पाहिला तर रात्री गादीत सू झाली मला पण तेव्हा मी लहान होते. दोन महिन्या आधी. आता मोठी झालीये, पण पप्पा पाहू देत नाहीत आता.

आमची हसून हसून मुरकुंडी वळली. तर हिने ताबडतोब सांगितलं- बच्चे ऐसा करते है, उसमे क्या इतना हसनेका?

मग गप्प बसलो आम्ही आणि मोठे डोळे करून स्टोरी चालू झाली.

त्या पिच्चर मधल्या गावात खूप हादसे होत असतात आणि खूप अनहोन्या होत असतात म्हणून लोक सदम्यात असतात.

आम्ही- अरे बापरे- डेंजर आहे

सदमा काय, हादसे काय...

पन्या- शू ssssss, भुताची गोष्ट सांगतेय मी.

क्रमशः

टीप: पन्या डॉन ने आवरलं नव्हतं म्हणून फोटो काढू देत नव्हती. शेवटी एक कसाबसा काढलाय. आपण नाही घाबरत कुणाला म्हणताना. पण त्याची क्वालिटी नका पाहू प्लीज.

 

  #पन्या:

सगळेच आपले घरात बसून... ,मग या डॉनला आला कंटाळा आणि भर दुपारी 12 वाजता डायरेक्ट पळत किचनमध्ये. तिच्या अचानक पळापळीने माझे वडिल वैतागून- पन्या, कुठूनही पळत एकदम किचनमध्ये नाही जायचं अजिबात.

पन्या- कुठूनही नाही काही, आमच्या घरातून इथेच आलेय मी.

बाबा-अग पण आत्ता कशी आलीस तू?

तोवर तिचे पिताश्री मा. मुकेश साहेबांची गगनभेदी आरोळी ऐकू आली- पन्या, मार खाशील आता खूप .

मी: काय केलंस ग? पपा का ओरडतायत?

पन्या: काही नाही, मी दंगा केला, दिदीशी भांडले म्हणून.

मी: जा आधी घरी, सॉरी म्हण पपाना, मग ये.

पन्या: काही नाही होत. दिदीला ओरडायच तर मलाच ओरडतात.

मी: अग, जाऊन तर ये, पप्पा खरंच मार देतील.

पन्या: impossible. पप्पा मला मारत नाहीत. त्यांच्या छातीत दुखतं खूप मला मारलं तर. सिम्पल knowledge

मी: छातीत दुखतं? हे काय आता? तुला कुणी सांगितलं?

पन्या:पप्पा च म्हणतात. मागे एकदा मी खू sssप लहान होते ना, तेव्हा ममीने माझं नाव त्यांना सांगितलं, मी दंगा करते म्हणून. मग मला मारलेलं पप्पांनी. दोन फटके मारले आणि मी खूप रडायला लागले. आणि मग त्यांच्या छातीत दुखायला लागलं एकदम.

आता हा प्रकार नवीनच. मी नवऱ्याला म्हणाले हे मुकेशच दुखणं माहीतच नाही रे आपल्याला.. विचारू त्याला.

नवरा प्रचंड आत्मविश्वासाने- काय म्हणाले ग पप्पा तुला मारलं तर?

पन्या: मोठे मोठे डोळे करून पप्पाची acting करत- त्यांनी मला असं असं जवळ घेतलं आणि म्हणाले- पन्या रे... माझं बाळ ग ते... मला नाही आवडत तुला मारायला.. नको ग बाळा असा दंगा करू.. माझं शहाणं लेकरू ग ते.. तुला मारलं की दुखतं ग माझया छातीत. ... ,acting संपवून- तेव्हा मला कळलं की मला मारलं की त्यांच्या छातीत दुखणार. मग आता मी..

मी मध्येच- दंगा करत नाही असाच ना?

पन्या: नै काही... ते घरात नसल्यावर करायचा दंगा. मग त्यांना काही नाही होत.

मी डोक्याला हात लावून बसलेली आणि नवरा मला चिडवतोय- जा विचार मुक्याला, तुला कधीपासून हार्ट ट्रबल आहे ते.

पन्या: हं, आज मी लौकर आलीये तर आपण...आणि माझया वडिलांकडे लक्ष जाताच- लगेच खेळायचं नाही काही. जेवून झोपा तुम्ही. मग 4 वाजता खेळूया आपण. आजोबा, मी आता समजूतदारपणे वागायचं ठरवलंय. मी ओरडणार नाही आता.

माझे वडील: खरं ना? Good girl

पन्या: त्यांच्या कानाजवळून ओरडत- yeyy, 4 वाजता खेळायचं.

वडील: हो, पण तेव्हा ओरडायचं?????

पन्या- खचचून ओरडत- नाही

क्रमशः

 

 

May 26,2020

वृद्ध आणि लहान बाळं एकसारखीच असतात असं म्हणतातच ना... आत्ताच आला त्याचा ताजा ताजा अनुभव.

आमच्या कॅफेचे एक आजीआजोबा अगदी सुरुवातीपासूनचे नियमित ग्राहक आहेत. 80 गाठलेले. त्यांना जमत नाही यायला म्हणून आम्ही त्यांना हवं ते घरी देतो. आता माझा नवरा त्यांचा अति लाडका.हा गेला त्यांच्याकडे की तासभर गप्पा नक्की. आत्ताही तसंच. तो आला तेव्हा म्हटलं झाल्या का दोन महिन्यांच्या गप्पा?

तर म्हणाला अग नाही. आजचा विषय होता 'आरोग्य सेतू'. मी गेलो तर म्हणाले तुझ्या फोनमध्ये आहे का आरोग्यसेतू? मी म्हणालो हो.

तर म्हणाले आमच्या दोघांच्या फोनमध्ये कसं नाही दिसत? मला वाटलं की काही अडचण आहे. मी फोन पाहिला तर त्यात काहीच नाही.

मग म्हटलं अहो डाउनलोड केला का? तर म्हणे की आम्हाला वाटलं तसाच येणार तो फोनमध्ये .

आत्ता दोघांच्या फोनमध्ये तो डाउनलोड करून दिला तेव्हा दोघे खूष.

खुदकन हसू आलं अगदी.

एका निर्मळ हास्याने दिवसाची सुंदर सुरुवात.

 

 #पन्या:

आमची पन्या खेळायला येते ती मात्र मास्क,शूज सगळं व्यवस्थित घालून. कोरोना आलाय आपल्याइथे इंड्यात- माहिते? मास्क आणला का तुम्ही? दाखवा मला... अशी आमची झाडाझडती चालू. 

तर त्या दिवशी तिने एक नवीन मास्क घातला. सुंदर डिझाइनचा. आल्या आल्या काकांसमोर उभे राहून मला नवीन मास्क आणला, तुम्हाला नाही असं वेडावून दाखवत नाचून झालं. हा म्हणाला- तू टीव्ही वर पाहिलं नाहीस का? असले मास्क चीन मधून घाणेरड्या कापडाचे येतायत. आम्ही नाही घालत बाबा असले मास्क. पहिल्यांदाच विचारात पडली ती. माझा मास्क चांगला आहे असं क्रमाक्रमाने उतरत्या आवाजात सांगून झालं तिचं काकांना. पण काका चिडवत बसला तिला. तशी सरळ उठली आणि दुसरा मास्क घालून आली. आम्ही म्हटलं हा कोणता? तर म्हणाली तो दिला टाकून. मी पप्पाना नवीन घ्यायला लावला . आम्ही खिडकीतून पाहिलं तर मुकेश- आमचा मित्र- तिचा पपा आमच्याकडे- काय राव खर्चात पाडलं मला असा पहात होता   

इकडे हिचं उड्या मारणं चालूच होतं. तिचे केस इतके सुंदर , मुलायम,रेशमी आहेत की बास. मी म्हटलं, केस किती छान आहेत पन्या तुझे...   तर लगेच थांकू म्हणून आपल्याकडे एक फ्लाईंग किस.  

हा म्हणाला तुझा हेअरकट कोणता आहे ग? 

पन्या: डोक्याला हात लावून- अहो काका- बॉयकट आहे हा. काय हो, इतकं पण नाही माहीत तुम्हाला...

काका- पण तुझा हेअरकट करत कोण आता? लॉकडाऊन आहे ना?

इथं एक सांगायचं राहिलं. तिच्या पप्पाचं सलून आहे. आमच्या घरातली मेम्बरं अर्थातच तिकडे असतात कटिंगला.

पन्या: अहो, पप्पा. त्यांनीच केला. तुम्हाला नाही माहीत? ते कटिंगर आहेत.

आम्ही दोघे एकदम: काय आहेत?

पन्या: दोन्ही हात पोटाशी घेऊन, जोरात किंचाळून.. अहो कss टिं ss ग ss र. जो माणूस आपली कटिंग करतो त्याला कटिंगर म्हणतात. काय हो तुम्ही? इतकं पण नाही माहीत.

आम्ही प्रचंड हसलो, पन्याही आम्हाला एक नवीन शब्द शिकवला म्हणून तेवढीच हसली. असलं गोड आहे ना सगळं...

आमच्या परिसरात कुणी कोरोना बाधित अजून तरी नाही सापडलं. पण आमच्या इथल्या 3 शाळा कवारंटाईन केलेल्या लोकांसाठी वापरत आहेत त्यामुळे घरासमोरून सतत ambulance आणि pmpml च्या या लोकांना घेऊन येणाऱ्या बसेस ची वर्दळ आहे. मग ही पन्या आम्हाला ब्रेकिंग न्यूज देते.

आत्या- 5 positive निघालेत आज कोरोना चे. मेलोच आता आपण.

माझे वडील- बघ मग पन्या, घरात बस तू आता. लॉक डाऊन आहे ना...

पन्या- आजोबा, मी घरातच आहे की.

आजोबा भडकून- अग, हे माझं घर आहे.

पन्या शांतपणे- माहीत आहे मला. लॉक डाऊन म्हणजे घरात बसा. कुणाच्या ही चालतं. मला माहीत आहे.

आम्ही तिघे- अर्थात निःशब्द. नवीन अर्थ कळला ना..

पन्या मॅडम विजयश्री साजरा करत त्यांच्या घराकडे...

क्रमशः